** البارت التاسع عشر **
علي : ( تم يطالعها ويحس نار شبت داخله بس قالها بهدوء ) اسمي علي
( وخلاها وطلع من الغرفه راح الصاله )
منار حست بكبر الكلمة اللي اطلعت منها .. وان فوق ماتزوجها واهي حامل بغيره هم تغلط تقول اسمه بجذي موقف!!
قامت اطلعت من الغرفه وراحت الصاله لقته قاعد عالقنفه ومثبت اكواعه على فخذه وماسك راسه
قربت منه وحطت ايدها على جتفه
منار : علي والله ماقصدت
علي : ( ماتحرك ولا طالعها ) خليني بروحي شوي
منار : ( اقعدت على اركبها جدامه وامسكت ايده بتوخرهم عن راسه ) علي اسمعني الله يخليك خل اشرحلك
علي : ( نزل ايده وطالعها ) منار خليني شوي روحي نامي بقعد بروحي
منار : علي انا كنت اتذكر اللي صارلي مع ..
علي : ( صرخ عليها حيل ) منار خلاص لا تطرين اسمه جدامي
منار : ( اسكتت من الصدمه لأن صرخ عليها فجأه )
علي : ( يكمل صراخ ) حسي فيني شوي .. المفروض تنسيني ان في احد لمسج قبلي
منار : ( دموعها انزلت من كلامه وتمت اتطالعه وحنجها يرجف )
علي : ( يطالعها ويتنفس بصوت عالي ومسكر ايده حيييل من العصبيه )
علي : ( قصر صوته شوي ) قومي روحي دارج
منار : ( قامت واهي تبجي وماقالت ولا شي )
اول مادشت الغرفه شال الطاوله وحذفها عالطوف
منار اسمعت الصوت جان تقط نفسها عالسرير وتبجي لين نامت
--------
عالية : انت اشسالفتك كل يوم اشوفك بالهده تطالعني .. روح من اهني لا يشوفك اخوي
الشاب : لو اخوج يخاف عليج مايخليج تمشين هالمسافه كلها .. جان وصلج عند باب المدرسه
عالية : ( ساكته ماترد وتمشي واهو بسيارته يسايرها ومبطل الدريشه يطالعها )
الشاب : زين طالعيني عالاقل مو لازم تسولفين بس امشي وطالعيني
عالية : وخر من اهني والله الحين اناديلك الشرطه
الشاب : ( يظحك ) شمسويلج انا ؟ كيفي قاعد امشي بسيارتي يم الرصيف اللي انتي تمشين عليه وين الجريمه؟ وبعدين اشرايج اوصلج انا لي الباب اشهالاخو اللي يقط اخته عالشارع ويخليها تمشي كل هالمسافه ؟
عالية : ( ماردت عليه )
الشاب : والله انج دشيتي قلبي وانا صراحه امي بتزوجني فإذا عطيتيني مجال والله حاب اتعرف عليج بغرض الزواج
عاليه : (اوصلت حق باب المدرسه و ماردت عليه ودشت )
------------
الصبح منار قامت من النوم اطلعت الصاله مالقت علي وشافت الطاوله مقلوبه والاغراض اللي عليها متناثره بالارض
راحت اسبحت و بدلت وصلت و اقعدت ترتب الصاله واهي متضايقه من اللي صار .. خلصت جان تروح اتدق بتشوف علي وينه
دقت حوالي 4 مرات بس مايرد عليها بس بالمره الخامسه رد
علي : الو
منار : وينك؟ كنت احاتيك
علي : لاتحاتين مافيني شي
منار : انت مانمت اهني امس صح؟
علي : اي صح
منار : متى بترد ؟
علي : مادري والله
منار : قلت يعني اسوي لنا غدى بدل المطاعم
علي : لا ماراح ايي عالغدى اكلي انتي
منار : ( حست انها حيل متضايقه ماتعودت يكلمها بهالاسلوب ) زين وينك الحين
علي : مشغول الحين يللا مع السلامه ( سكر الخط )
منار : ( تمت اتطالع السماعه وعينها كلها دموع )
---------
علي دش بيتهم وامه كانت بالصاله اول ماشافته جان تبجي وتلمه
علي : يمه لاتبجين والله انا بخير
ام علي : ( اقعدت عالقنفه وقعد يمها ) يايمه شمسوي بروحك ؟؟ تاكل عدل؟؟ محتاج شي؟
علي : يمه والله انا بخير نطرت ابوي اول ماطلع دشيت عشان اشوفج وهم باخذ اوراقي وشهاداتي
ام علي : بتشتغل بمكان ثاني؟
علي : اي بشوفلي شركه اتشغلني
ام علي : ليش ؟ محتاج شي؟؟
علي : لا الحمدلله انتو ماخليتو علينا قاصر حاطين حق كل واحد مبلغ كبير بالبنك وهم تنزل لي ارباح بين فتره وفتره يعني لاتحاتين مو محتاج بس هم لازم اشتغل مايصير اقعد جذي
ام علي : ( نزلت راسها ) اي صح انت الحين متزوج وكلها جم يوم واتصير عندك
علي : ( مسك ايد امه ) يمه اهي عايشه عندي الحين
ام علي : ( انصدمت وطالعته ) بس انا توقعت انها بس ملجه
علي : اي ملجنا وخذيتها معاي احنا الحين قاعدين بشقه
ام علي : يمه ليش صار كل هذا .. ابوك قعد يلومني اني السبب وماربيتك عدل .. علي انا مو مصدقه انك تسوي جذي ببنات الناس
علي : ( ساكت )
ام علي : انا مابي ازيد عليك بس ودي لو كل هذا ماصار لو حكمت عقلك قبل لا تسوي الغلط .. بس صار اللي صار مايفيد الكلام الحين
علي : ( يبوس راسها ويقوم ) انا باخذ اوراقي واروح
ام علي : يمه الله يخليك مر علي كل يومين لا تقطع
علي : ان شاءالله
-----------
- عالية بالفرصه مع رفيجتها –
عالية : والله يا خلود صارله جم يوم يتنطرني الصبح وبالهده
خلود : زين علمي اخوج خل يطقه
عالية : لا ماقدر عثمان شراني يخرع ومابي افتح عينه اهو من غير شي كل ما كلمتج بالتلفون يشك
خلود : زين اشلون يعني؟
عالية : مادري .. بس اليوم قالي اني عاجبته ويبيني زواج
خلود : الله وناسه .. كلميه
عالية : من صجج؟؟ وانا اشدراني ان صاج؟
خلود : تعرفين نوره حمد ؟
عالية : نورو ماغيرها؟
خلود : اي .. هذي بعد كان واحد كل يوم ينطرها بالهده ويحن عليها لين كلمته واهم الحين مالجين
عالية : والله صج؟
خلود : اي والله .. اشدراج هذا مايطلع جذي وتطيرينه منج خو الحين الكويت نصها عوانس
عالية : عاد بيني وبينج اهو حلو .. بس انا ماحب هالسوالف وانتي تدرين
خلود : كيفج انا شكو
-------------
منار سوت سباجيتي وراحت انسدحت بالغرفه و ناطره علي لين يرجع عشان تتغدى معاه
منار : ( منسدحه وتتذكر امها ) ولهت عليج يمه .. لو تشوفين بنتج اشصار فيها بغيابج بس لاتحاتيني علي معاي واهو يحبني والله يقدرني اني اسعده
( حطت ايدها على بطنها ) وانت .. آسفه اني يبتك بهالطريقه والله مادري اذا راح يحبك علي مثل ماقال او لأ
----------
صالح : علي من صجك ولا تتغشمر
علي : اي والله منصجي
محمد : مالج صج صج؟
علي : ايي ملجت خلاص عاد سالفه اهي
صالح : بس اشلون انت حتى ماقلت ان في احتمال تتزوج توقعتك تقعد عزوبي
علي : ليش يعني ؟ شنو ناقصني عشان ما اتزوج
محمد : من ناحية مو ناقصك شي اي بالله صدقت مو ناقصك شي .. اصلا لو انا بنت جان تزوجتك
علي : ( يظحك ) اتحبني وساكت؟؟
محمد : لا والله لو انا بنت افكر بفلوسك واتزوجك
علي : اي ادري فيك انسان مادي الله يعينك على نفسك
صلاح : زين مرتك المصون اشلون تزوجتها ؟ يعني اتعرفها ولا امك خاطبتها لك ولا شنو ؟
علي : بس خلاص تحقيق اهو .. تزوجت وبس سكرو السالفه
محمد : زين للحين مأجر متى تشتري سيارة؟
علي : هونت ماراح اشتري ناطر سيارتي تطلع من الوكاله
محمد : متى تطلع؟
علي : بعد جم يوم .. يللا شباب انا رايح مع السلامه
--------------
عالية : ( بالهده اتكلم خلود ) كا شوفيه اللي بالكورفت
خلود : اي والله حلو بس شوفيه اشلون يخزج
عالية : امبيه كا عثمان يه لازم اروح مع السلامه
خلود : باي
------
علي دش الشقه لقى منار نايمه بالغرفه بدل لبس بس شورت وانسدح عالسرير وعطاها ظهره وتلحف
منار حست عليه جان تبطل عينها لقته ماعطيها ظهره
منار : علي ؟؟
علي : نعم؟
منار : انا مسوية سباجيتي ماتبي اتذوق اكلي؟
علي : بعدين .. انا الحين دايخ مانمت من امس
منار : ( قربت منه صارت وراه على طول ) علي ؟؟
علي : منار والله دايخ بنام
منار : علي انا آسفه
علي : عادي ماصار شي
منار ردت مكانها وعطته ظهر وقاعده تحاول تنام
الرئيسية 
أحدث الصور 
الخميس فبراير 18, 2010 4:40 pm
